香港四大奇食(一) 九記牛腩

澳牛的黃昏話「香港有四大奇食:澳牛光速餐、星座蕃茄面、新記芝士面同九記牛腩。……如果你廿五歲以上,無試過四大奇食的任何一樣,請主動要求入境處重新檢視你香港人嘅身份。」

幾個月前我廿六歲 但係仲未試曬住四大奇食
好彩今日我已經可以唔洗請入境處check下我係咪香港人
令我終於名副其實成為香港人嘅奇食就係九記牛腩

九記位於中上環
所以作為新界人嘅我 到今時今日先黎拜會絕不為過
(其實四五年前係上環做過part time
但係九記對於當時時薪同而家最低工資相差無幾嘅我實成係奢侈品
又其實我當時年少無知 係無聽過九記呢個名嘅:p ) 

lunch hour 黎到九記牛腩
第一眼會見到嘅野就係人龍
第一次黎嘅時候會擔心幾時先有位 會唔會趕唔切返公司
不過擔心係多餘嘅 因為九記有兩層
兼且佢地用walkie溝通 一有人走佢地就即刻叫人入座
樓上落order都係一個walkie搞掂 完全唔洗寫單交入廚房走黎走去
野食又黎得快 所以簡直貨如輪轉
等位時間不過十分鐘 而坐低嘅時間都應該得十五分鐘左右

好 入正題


咖喱牛筋腩伊麵 $42
牛腩唔乾唔韌唔黐牙 牛筋燜得淋又有膠質
份量又夠多 基本上每食一啖都都可以食一舊牛筋/腩
伊麵煮得啱啱好 不過同咖喱汁相處時間唔夠長 完全唔入味
咖喱汁亦唔夠濃 依附唔到係麵上面
或者呢個係撈麵同湯麵嘅分別
但係我唔捨得加幾蚊去試撈伊
下次應該都係食左上湯牛腩麵先會再考慮咖喱牛筋腩撈伊

另外提一提男士 可以有心理準備一碗食唔飽
而對於女士黎講應該算係啱啱好

雖然話係香港奇食
但係成枱七個人得我一個香港人
兩個內地同事同四個內地遊客
不過其實大家都係靜靜地食完自己碗麵 大家互不抵觸
所謂嘅中港矛盾 製造者根本就係特區政府!

麵麵店

係佐敦想去合一cafe
但係望一望個餐牌價錢又有d貴
啱啱附近就係麵麵店



門面完全睇唔出佢係車仔麵檔
完全打破平時車仔麵ge格局
原來麵麵店係佐敦開左十幾年
後來因租金問題被迫結業
係阮小儀入股後在現址重新開張

講返野食
order 左麻辣牛根腩撈米線 台式肉燥飯 咖央油炸鬼


麻辣牛根腩撈米線 $36
雖然係麻辣 但係其實只係微辣
牛根腩勁多 食到最尾都仲有係度
配菜仲有青瓜絲同芽菜 粗幼同米線差唔多
食落唔會覺得凸


台式肉燥飯 $37
呢個台式肉燥飯除左有肉燥之外
最特別就係有炸豬頸肉
可能炸曬佢d 肥油出黎 所以唔覺得好膩
雖然好大碗 但肉燥加上豉油好啱撈飯 好容易就食得曬


咖央油炸鬼 $15
一碟四件 熱辣辣新鮮炸出黎
食落唔油 不過個人唔多好咖央…. 因為太甜
所以呢件甜品我食一件就夠 食兩件就開始有d膩
所以下次要試會試魚蓉油炸鬼

味道: 8/10
環境: 7.5/10
服務: 7/10
人均消費: $45

http://www.openrice.com/restaurant/sr2.htm?shopid=96586
小儀強推廟街食車仔麵
麵麵店facebook page

甜牙牙

聽過朋友講話呢間好食
又睇過如果45 分鐘食得完佢個有九層窩芙嘅「窩芙巨無霸」就free嘅報導
今日終於黎到試下啦
order左個完熟classic心太軟 同埋 冰火綠茶木糠布甸 同朋友一齊share


冰火綠茶木糠布甸
綠茶mousse 滑得黎又唔算澀
重要ge 係木糠比例啱啱好
食落d木糠唔會太乾又唔會「續」親喉嚨


心太軟真係so sorry
真係比唔到好評
係就係好流心
但係朱古力真係太苦
唔加埋雪糕食真係sosad
仲有士多啤梨有d多餘
酸之餘同個心太軟唔夾
唔加好過加
如果淨粹係裝飾咁我都無話可說

最出名好似係窩芙
下次試下先

味道: 7/10
環境: 8/10
服務: 7/10
人均消費: $45

http://www.openrice.com/restaurant/sr2.htm?shopid=113139

巴希雅海灣重慶燒烤

20121222-110949.jpg

大概兩個月前知道有呢餐廳
口碑好似唔錯~
好! 就決定十二月朋友生日去呢度慶祝~

叮囑下係一個月前就打去BOOK 枱
順利訂左十四個人
前兩三星期就比左訂金三百大洋

終於黎到BBQ當日
大埔火車站再轉75K巴士
半個鐘後到達龍尾村 再向車尾方向行一陣就到啦~

入到去… 比錢先~
位位$128 任食三小時
野食包括平時燒野食腸呀丸呀扒呀咁
特別D 仲有腐皮大蔥南瓜雞軟骨鴨胸蕃茄茄子羊扒香蕉洋蔥韮菜蒜蓉多士鯖魚煙肉蕃茄卷金菇肥牛卷銀杏豬頸肉豆角秋刀魚冬菇
仲有一人一隻大蝦同一件菠蘿
另外每個爐$40 跟爐送上一煲蜆 同 芝士蒜蓉西蘭花/金菇
其實呢度唔似平時 BBQ 要用ge燒烤叉
正確d黎話應該話係串燒
一黎就食左好多串牛肉雞肉
自己可以撒上香草孜然等等
整體黎講呢度真係唔錯
食物質素高 種類又多 refill 速度又快
特別點評以下幾款:

大蔥
燒過ge 大蔥絶對無辣味/草青味
反而更加多汁同甜味
當然唔包括燒焦左ge外層 =p

茄子
最特別係 原! 條! 燒!
燒到中途係中間切開
見到佢係度呼吸XDDD
燒到軟棉棉又多汁
不過我地太輕手 調味調得唔夠~ 可惜可惜~

蜆煲
未開始ge 時候見佢好似得d 蜆
之後又以為佢係清酒煮
食落其實佢真係乜調味都無
只係用返蜆入面原有ge 鹽水黎煮
幾乎全部蜆都可以打開口
再加上原本乾水ge 蜆煲煮完之後有唔少水
証明大部份ge 蜆都仲好新鮮
蜆肉其實唔算大粒 不過勝在無沙
食左咁多隻都食唔到有沙
所以我諗佢都吐左一輪沙先黎到我地面前
平凡的心機之作XD

羊扒
出去拎野食拎左幾次終於拎到啦!!
大大件 脂肪唔算多 所以羶味唔重
連平時唔食羊ge 朋友都食到一啖
加上真係燒曬咁多面封住d 肉汁
又燒到啱啱好熟
食ge 時候仲見有粉紅色兼無血水
真係好正ar~~肉質嫩滑又有少少咬口 唔會咬唔開亦唔會攝牙罅
食ge 時候有少少羊羶味 但係又唔會殘留係口腔好耐 如果可以加埋薄荷就好啦*v*

菠蘿
本餐亮點!!
印象中ge菠蘿梗係一個字! 酸!
而且就算浸完鹽水 食入口都會有少少唔舒服
(因為菠蘿有菠蘿酶… 可以使肉類變得軟嫩)
燒過ge 菠蘿 酸味沒有了 多汁而且甜味提升
甜度完全可以媲美罐頭菠蘿
其實食一件真係唔夠!!

香蕉
原隻咁燒左2隻蕉
第一隻燒到d 皮黑曬之後再燒到有少少水必出黎
(第一次見”香蕉汁” 仲要係一d 都唔杰 完全係液體狀)
嗯~ 好啦  切開佢再加d 朱古力漿先~
不過隻蕉燒得唔夠熱唔夠透 所以食落同無燒差唔多
再戰第二隻!
今次燒到佢勁多汁必出黎先食
熱辣辣而且軟棉棉 差d 連夾都夾唔起
正過第一次好多!!
下次食記得要燒到見到好多汁先好罷休!

唯一ge 缺點就係$128只係包一罐汽水 同埋額外ge 調味例如蜜糖蒜蓉要另外比錢
如果可以連飲品調味都包野真perfect勒!
呢度絶對係4-5個朋友去ge好地方! 期待下次encore!
提提各位  呢度比較適合天時冷ge時候
因為我係二十度以下ge 天氣 都係除左外套著住短袖衫黎食ge

味道: 8.5/10
環境: 6.5/10
服務: 7/10
人均消費: $128 人頭費+$40爐錢+額外ge飲品/調味料

http://www.openrice.com/restaurant/sr2.htm?shopid=46984

中伏!螢壽司日本料理

係旺角返工
openrice 黎黎去去都係果幾間
唯有自己周圍行下踫運氣

今次黎到螢壽司日本料理
駐足門口 諗住入去食滑蛋雞扒飯
應該實無死掛

點知!中伏!
一開門已經聞到陣up味
但係已經踏左入門口 唯有頂硬上
睇多次餐牌 都係照食滑蛋雞扒飯啦


終於黎到 同我心目中ge滑蛋雞扒飯相差好遠
第一 滑蛋唔係流質 撈唔到飯!
第二 雞扒同蛋下面竟然係照燒汁!
第三 雞扒竟然有d薑蔥!

唔可以話佢貨不對版
但係真係唔係一般ge滑蛋雞扒飯
估唔到一碟飯可以有三種咁唔夾ge味放埋一齊

openrice有時真係可信ge
6笑 vs 14OK vs 18喊
我一點先去食飯 一個人坐四人位
餐廰都仲有一半係吉ge
到食完為止 都係一入到黎就有位
我諗應該有好多人中過伏
blacklist 左唔會再黎(包括我在內:p)
味道係一個因素 氣味都影響好大
我對呢間餐廰ge第一印象就係由氣味黎破壞ge~

味道: 2
環境: 2
服務: 3
人均消費: $35

丼吉

同同事旅行前farewell (其實只係搵個藉口黎一齊食下飯)
一行八人黎到The One丼吉
book 左枱但係都要等一陣
大概十分鐘後就可以入座
見到碗入面ge芝麻已經急不及待咁係咁磨
磨到咁上下 大家先醒覺 我地仲未叫野食XD

最終我地叫左兩個三人餐同2個吉列蝦豬扒定食
三人餐總共有四款食物: 豬扒, 蝦, 豬柳 同埋蠔
另外仲有一小碟醃菜同埋麵豉湯 飯同椰菜就無限refill
諗起日式吉列食物, 第一樣就係吉列豬扒
所以第一樣就試吉列豬扒! 可惜….
豬扒無想像中好 無肉汁不過好彩咁厚都唔算韌 肉質比較結實
蝦就算係爽口彈牙 不過無咩鮮味
豬柳比起豬扒好味 比較軟滑 無豬扒咁乾又無豬扒咁韌
蠔就好肥美好creamy! 又唔會有泥味~~

【三人餐 $512】

最後一員終於黎到 點左一份吉列蝦帶子定食
無試味不過見到好大隻 切開又好似啱啱熟好滑咁
下次黎應該會食海鮮拼盤定食(唔知有無)

其實全部炸物都炸得好好
每一款食落都唔油膩 又炸得好香脆
粉漿同食物比例啱啱好 食到外層ge香脆之餘又食到食材的味道
同埋粉漿同食材真係痴埋一齊 唔會散收收
另外不同炸物配上不同ge醬汁
豬扒同豬柳有三款醬汁: 豬扒汁,芥辣同鹽
不過個人覺得豬扒汁同鹽都太咸 豬扒汁亦蓋過左芝麻ge香味 芥辣就完全唔來 (唔通係我聽錯左待應ge介紹?!!)
海鮮類就配他他醬就係正常配搭
最後仲有芝麻紫菜汁 柚子汁 配上無限refill ge椰菜
柚子汁味道較酸 芝麻紫菜汁就比較惹味 易d入口
就算食到好飽都仲可以食得落

順帶一提 服務真係ichiban
侍應非常主動地為我地添飯同椰菜
加茶之餘又幫我地斟茶
又介紹各種醬汁
唯一少少瑕疵就係book 左枱都要等位

【同場加映-雜錦刺身沙津 有coupon~免費嘅~】

味道: 3.5
環境: 4
服務: 4.5
人均消費: $200

丼吉@THE ONE

麥當勞綠茶紅豆新地

十點鐘先放工
食杯雪糕獎勵下自己先
新出左焦糖布丁麥旋風同綠茶紅豆新地
前者食過覺得太甜….份量又唔多….而且仲要成十三蚊
綠茶紅豆呢個甜度對我黎講就啱啱好(不過實在係見仁見智)
罐頭紅豆加綠茶糖漿只係少少甜, 甜中又有綠茶特有ge甘味
綠茶糖漿唔係由綠茶粉開出黎, 所以少少粉粒都無
美中不足ge 係紅豆唔夠綿 不過總好過花生咁黐牙
而家佢價錢都算合理~~~ 七個大洋咋~
總結一句, 佢有機會被encore

題外話……
如果大家食呢個雪糕ge 話….
記得綠茶糖漿同雪糕一齊食….
因為佢唔似朱古力新地 可以朱古力還朱古力食…
齋食個綠茶糖漿實在有點兒太…..澀….了

味道: 4
人均消費: $10